السلام عليكم ورحمة الله وبركاته
شلونكم ؟ شمسوين مع البرد ؟ و الأهم شمسوين مع الإجازة ؟
قبل جمن يوم رحت الجامعة عشان أطبع جدول الفصل الياي همم ما أبي
أفكر فيه لأني باتذكر جم يوم بقى وتنتهي إجازتي الجميلة ، بس الشي الي
أبي اقوله أني نزلت مادة لغة يابانية :S الله يستر حدي خايفة لأن رأس مالي
من الكلمات هو " كومبوا و قوميناساي " لوول
أمس 8/ فبراير/2011 كان يوم خطير و عجيب و أكشني و كله مفاجآت و .... أكل !
إي ما بتتخيلون شقد كلت فيه ! و بتعرفون ليش عقب شوي .
بدا اليوم بالقومة حق صلاة الصبح ، كان الجو حده بارد والسرير دافي يخلي الواحد
ما يشتهي يتحرك منه ، لكن كنا متفقين أن نطلع في هل اليوم فإستسلمت و قمت * تنهد*
بعد شرب شاي الحليب الساخن مال أمي ، ردت فيني الروح على خفيف و كنت أقاوم النودة
الي فيني لأن أعرف إن رجعت لغرفتي برقد من يديد !
وبعد الريوق الساخن و بعد الإنتظار مدة عشان نستجمع طاقتنا و صحوتنا إنطلقنا في الرحلة المنشودة ..
أول محطة على جدولنا كانت مجمع البحرين لزيارة Manga Cafe الي فتحوه هناك
تلقونه في الطابق الأول يم كوستا كافيه ،، مع أنه ما يستاهل أسوي له دعاية مجانية
أسعاره كلش مب زينة و حرامي آخر درجة بس رحنا نتطمش و نجوف الأغراض الحلوة الي عنده
لبيه لولو الحلو ، على فكرة هذا بـ11 دينار ، والبرواز بلاسيك و رخيص ومايستحق سعره !
أحلى شي أنه معلق صور سيباس- العزيز في كل مكان ، فكل ما ألف راسي ألقاه قبالي * تنهد من قلب*
جفنا مانجات أشكال و ألوان الوحدة بـ6 دينار ، بيني وبينكم ما تتساهل ، شريت من عنده في الصيف كوروشيتسوجي المجلد2
لأني كنت مضطرة و أبيه بسرعة ، مع أن لو سويته أوردر من أمازون بيطلع بنص السعر !
المكان الثاني في جدولنا كان
اي لا تستغربون ، كان خاطرنا أن نزور كنيسة و نجوف شنو داخلها " متأثرين بديجي مان "
و فعلاً رحنا كنيسة القلب المقدس ( يذكرني أسمها بقلب البرآءة لوول ) و سمحونا لنا ندخل لكن
التصوير داخل كان ممنوع ، و أصلا ما كان في أحد داخل و مع الأسف مكان الصلاة ( شيسمونه ؟ )
كان مقفول :( كنت ابي اجوف شكله من داخل و اذا عندهم بيانو و ماي مقدس ، هذي غلطتنا ان رحنا
يوم الثلاثاء المفروض نروح الأحد وقت الصلاة و نحطهم امام الامر الواقع ونخليهم يسون لنا جوله رسمية !
المكان الي عقبه في الجدول بعد له علاقه بديجي مان ،، من زمان و أنا أحلم بأن أجوف زهرة اللوتس
على الطبيعة وكنت فاقدة الأمل أن ألقاها في البحرين ، لكن الحمدلله طلعت موجود في مشتل في البديع
و جفتها أخيراً ( أحب كاااااندااا مع أن هذي وردة المرأة الكافرة الي يح*ا اهىء اهىء )
“As a lotus flower is born in water, grows in water and rises out of water to stand above it unsoiled, so I, born in the world, raised in the world having overcome the world, live unsoiled by the world”
حدها حلوة ، حبيت الوردية أكثر من البنفسجية بس كلهم حلوين ، أبي أشتري وحدة بس المشكلة ماعندي مكان أحطها فيه
إستراحه الغداء ، يم لذيذ
ثم التوجه للحدث الأهم في ذاك اليوم ، تارلالالالالا >>> مؤثرات صوتيه
زيارتنا الأولى لمعرض الطعام والضيافه !! كنا ننطره من زمان و صادف أن أمس كان يوم أفتتاحه
فكانت فرصتنا الذهبية عشان نزوره ونستمتع
أول شيء جفناه عند المدخل ، هذي التشكليه اللذيذة من الكب كيك ياسلااام
عقب قدموا لنا عينة شاي بالحليب ، كانوا يسوون تسويق لمكينة جديدة لصنع القهوة والشاي
من الشاي للكسكس المغربي ، هذي ثاني مرة أذوقه فيها ( أول مرة كانت في معرض الجاليات في الجامعة )
كان حده لذيذ وسبايسي يم يم
كل مكان يطلع الكب كيك جدامنا !!
عينة لتذوق أكلات مطعم يم يم ، جنه كان أكل تايلندي ؟
إرتحنا شوي في القسم المغربي و قدموا لنا الضيافه المغربية و عطونا الشاي المميز مالهم ، وكانت اغاني جميلة مغربية تشتغل
بس مع الاسف مافهمت منها شي لوول
صادني تشبع من الكب كيك ><
يأبرني هل الحرف
تاااداااا المفاجأة الأولى هي أن أحنا لقينا كنز " ون بيس " أخيراً بعد فشل لوفي و كل القراصنة عن الوصول له
جوفوا شنو طلع في النهاية
أقول ترحموا على قولد روجر بيطلعونه من القبر وبيذبحونه مرة ثانية على سواد الويه الي سواه
الناس ذبحت عمرها يدورون كنزه و آخر شي يطلع صندوق فواكه ، و قال شو عنوان الكنز " الصحة والسعادة " !!
وبعد ما طلعنا من المعرض و تذوقنا أكلات عديدة وشربنا قهوة فريدة " قهوة نواة التمر " إختراع جميل صراحه
و كانت لذيذة و خفيفة بدون كافيين و شرينا منها بعد ^^
توجهنا مباشرة لمطعم يم يم - محرق ، إكتشفت شقد إحنا مفجوعين عقب الأكل الي كلناه ما شبعنا هههههه
و بينما كنا نتناول الطعام بإطمئنان ، قال بعضنا أنهم لمحو البرق في السماء !! و كانت هذي هذي المفاجأة الأخيرة
في ذلك اليوم ، برق و عقب شوي طق علينا مطر الخير ، الحمدلله على النعمة ، قعدنا ندعي و احنا نجوف الجو يتحول
لعاصفة ممطرة عقب طلعنا برع نصور و نتبلل بماء السماء ،،
و في النهاية رجعنا البيت و رجعت لسريري الدافىء و لرواية آغاثا كريستي الي قريت منها فصل قبل النوم
و توتة توته خلصت الحكاية ،،
كان يوم عجيب و سوغييييه !!
ليست هناك تعليقات:
إرسال تعليق